Yuha Doting Blog

Satua Bawak

Olih I Wayan Juniartha

Inanalian kiwané, I Madé Blék Méjik Ingkrik-Ingkrik, sedeng émosi-inguh tingkat tinggi.

Lantas ia ngundang balian-balian kiwa ané lénan lakar ajaka diskusi, tukar pikiran, seminar lan lokakarya.

Pas Kajeng Kliwon magpag sandi kala diskusiné dibuka secara resmi.

"Cang mengundang sejawat, timpal satu aliran, sawiréh ada masalah mendesak sajan ané mengancam kelangsungan profési i ragané makejang," kéto abetné.

Anggut-anggut para inan balian kiwané. Konyangan negak masidekep. Sing ada ané nundik kopi ané makudus-kudus di méjané. Sing ada nyemak timus lan sumping ané matumpuk duur ingkané. Maklum, né nak rapat inan désti, teluh, terangjana. Yén gragas calép-calung bisa-bisa bangké gén mulih. Ba sesai sajan ada balian ané sing kéné sing kéto jeg maglebug mati.

"Ancaman totonan ada dadua. Ané kapertama, jeg ngancan ngaliunan gén jumlah dokteré jani, tur liunan ba sing percaya kén méjik, dadiné jumlah pasién i ragané sayan medikang, jumlah aturan daksinané masi turun drastic."

Nyangetang anggut-anggut peserta diskusiné. Senyum-senyum sinis makejang inget kén para dokter ané nu muda-muda umurné nanging ba pangkah ngaku-ngaku ngerti kén sakancan penyakit. Modalné tuah masuk nem tiban. Kalingké bisa nglekas dadi sampian mas, dadi bojog gén sing ada ané bisa. Nanging ba ngaku wisésa kén sakancan tamba.

"Pidan yén ada ané mutah-mising, pasti tangkil kén balian. Jani jeg ka Puskésmas lakuné. Tur seger masi dadiné. Patutné kan sik raga-ragané tangkil. Yadiastun sing seger dadiné, yadiastun mati pamuputné, nanging kan ba bareng ngalestariang budaya lan ilmu Baliné adané," kéto I Ketut Celuluk Jeruk Purut nyelag.

Tepuk tangan baliané makejang, semangat makejang, nanging tetep sing ada ané bani nundik cangkir kopiné.

"Ancaman kedua to jani liu sajan ané malajahin usada, malajahin tetaneman ubad. Ternyata uli batuk kanti struk ada don, buah, akah ané nyidang anggo nyegerang. Yén kéni carané sinah sakancan mantra, gagemet, tumbal, tur penyengker dagangan i ragané lakar sing ada né meli,"

Ba mulai émosi balian-baliané ningehang pidatoné I Madé. Mula seken-seken terancam éksistensi para balian kiwané. Konyangan jani menuntut tindakan jelas tur solusi segera.

Sing makelo pabligbagané ba langsung sepakat para peserta diskusiné.

Rékomendasi pertama; para inan balian kiwané harus ngaé dokter-dokteré ané tugas di désa-désa kena babainan makejang. Yén suba sakit makejang, lantas para balian totonan ané lakar ngubadin kanti seger. Sinah géngsi para baliané lakar menék tur masyarakaté lakar ngantré buin di umah-umah baliané.

"Masalahné, éngkén carané ngaé bebainan? Ba makélo sajan sing ada ané mesen babainan kanti engsap Cang carané ngaé. Lénan kén to, cang nak sing taén berhasil ngubadin babainan," ngrengeng I Ketut.

Rékomendasi kedua; para inan baliané sepakat lakar nyetik konyangan dagang obat hérbal lan jamu. Yén ba konyangan bangké sinah balian kiwané ba sing ada saingan. Dagangané lakar lais, suplai daksina arak berem lakar sing telah-telah.

"Yén majalan buin rencana nénénan, sing kanti telung bulan balian kiwané lakar buin dadi junjungan jlema Baliné. Kanti pemerintahé lakar ngemang para baliané nyalanang jaminan keséhatan Bali Mandara-né," kéto abetné I Madé.

Bungah-liang sing kodag-kodag para baliané. Makejang tepuk tangan suryak-suryak sambilanga nyiup kopi, sambilanga makpak sumping tur nguluh timus.

Sing kanti molas menit, pablégbég bah makejang baliané. Kejet-kejet awakné makejang. Mutah mising kiah-kiah. I Madé gén ané nu jejeg majujuk. Kedék ngrékék ya I Madé.

"Saingan ba sing ada, Cang ba jani inan balian kiwa nomor satu lan satu-satuné di Bali."

Buin maniné supermarket barang méjik I Madé-né resmi di buka. Uli cetik kanti babainan adepa ditu nganggo harga grosir lan misi garansi "pisaga sing mati, uang anda kembali". Sing ada saingan ya jani.